Ravindranath Thagor- රවීන්ද්‍රනාත් තාගෝර්තුමා (ක්‍රි.ව.1861-1941)
රවීන්ද්‍රනාත් තාගෝර් 1861.05.07 වන දින කල්කටාවට නුදුරු ජොසන්කෝ නම් පිටිසර ගම්මානයක උපත ලැබීය. ථාගෝර් හෙවත් ථාකූර් යන්න මහත්මා යන අර්ථය ගෙන දෙන බෙංගාලි වදනකි. වචනයේ පරිසමාප්ත අර්ථයෙන්ම ථාගෝර් කුටුම්භය ධනවත් වැදගත් මහත්මාවරුන්ගෙන් සමන්විත වූවෙකි.ඔහුගේ සීයා ද්වර්කනාත් මෙන්ම පියා වූ දේවේන්ද්‍රනාත් ථාගෝර් හට මහාර්ශී නම් අතිශය ගෞරවනීය උප පදයක් විය.
කුඩා ථාගෝර් පාසල් යාමට දැක්වූයේ මහත් අරුචියකි. ඒ එවකට ඉන්දියාවේ පැවැති බ්‍රිතාන්‍ය පබ්ලික් ස්කූල් (Public School) ආකෘතිය අනුව ස්ථාපනය වී තිබූ ඒකාකාර වූත් පීඩාකාරී ගුරුවරුන්ගෙන් යුක්ත වූත් පාසල් වටපිටාව නිසාය. රවීන්ද්‍රනාත්ගේ පියා සුදුසු ගුරුවරුන් ගෙදරට ගෙන්වා ඔහුට අධ්‍යාපනය ලබා දුනි. මේ ගුරුවරුන්ගෙන් ලද මග පෙන්වීම හා දිරි ගැන්වීම නිසා රවීන්ද්‍රනාත් තුළ තිබූ සහජ ශක්තීන් පිබිදුණි. ඔහු වයස අවුරුදු දොලහ වන විට කවි, නාට්‍ය හා කුඩා කතා ලියන්නට පටන් ගත්තේය. රාමායනය, මහා භාරතය, කාලිදාස කවියාගේ කෘතීන් හා බටහිර සම්භාව්‍ය ග්‍රන්ථ පවා ඔහු කියවන්නට පටන් ගත්තේය.ඔහු වයස අවුරුදු දහ හතර වන විට වංග සාහිත්‍ය සංග්‍රහයක සංස්කාරක වීමෙන් ඔහුගේ තරම වටහා ගත හැක.
දහ හත් වන වියේදී එනම් වර්ශ 1878 දී වැඩිදුර අධාපනය සඳහා එංගලන්තයට පිටව ගිය ඔහු ඉංග්‍රීසි, ලතින් යන භාෂාවනුත් එවකට ඉතාම සරුසාරව තිබූ ඉංග්‍රීසි සාහිත්‍යයේ අග්‍රගණ්‍ය කවි, නාටක හා ප්‍රබන්ධ කතාත් හදාලේය. විශ්ව විද්‍යාල උපාධි කිසිවක් නොලබා එහෙත් විශ්ව විද්‍යාල රැසක දැනුම ඇතිව සිය රට පැමිණි ඔහු කවි, කතා, කෙටිකතා, නවකතා සහ විචාර ලිපි ලියන්නට පටන් ගත්තේය.ඉංග්‍රීසි භාෂාවෙන් ග්‍රන්ථකරණයටද එතුමා දක්ශයෙක් විය. '' ගීතාන්ජලී, ගෝරා, අඩසද, තැපැල් මහතා හා කාබුල්කාරයා'' ඔහුගේ නිර්මාණ අතර වෙයි.
ඔහු එංගලන්තයේ සිටි සමයේ ඇසුරට පත් එච්.ජී.වේල්ස්, විලියම් බට්ලර්, යේට්ස්, එස්‍රා ෆවුන්ඩ් හා සිසිල් ඩේ ලුවිස් ආදී සාහිත්‍යකරුවන් සමග පැවැති සම්බන්ධතා ඔහුගේ ලේඛණ කලාවට මහත් අත්වැලක් විය. ඔහු මුලින් වංග බසින් ලියූ ''ගීතාන්ජලී'' වැනි කෘතීන් ඉංග්‍රීසි බසට පරිවර්තනය කිරීමට ඔහුට දිරියක් විය. තාගෝර් ඇමරිකා එක්සත් ජනපදයට ගොස් එරට උසස් විශ්ව විද්‍යාලවල භාරතීය සාහිත්‍යය පිළිබඳව දේශනා පවත්වනු ලැබීය. ඒ දේශනවල හරබර විද්වත්භාවය පිළිබඳව ප්‍රසිද්ධ පුවත්පත්වල, සඟරාවල ප්‍රශංසනාත්මක ඇගයීම් පළ විය.
රවීන්ද්‍රනාත් ථාගෝර්තුමාගේ ජීවිතයේ ඉතාමත් වටිනා වැදගත් සිදුවීම් දෙකක් ලෙස ඉංදියාවේ ශාන්ති නිකේතනය නම් ශාස්ත්‍ර පීඨය සහ ශ්‍රීලංකාවේ ඊට සමාන වූ හොරණ ශ්‍රීපාලි විද්‍යාලය පිහිටුවාලීම දැක්විය හැකිය. මේ ආයතන දෙකෙන් ම සාහිත්‍යය හා කලා ශිල්ප ආදියට පමණක් නොව සාමාන්‍ය විද්‍යා ශාස්ත්‍ර අධ්‍යාපනයට ද මහත් සේවයක් සිදු විය. ඔහුගේ ජීවිතයේ අනෙක් වැදගත් සිහිවටනයක් ලෙස ''ජන ගන මන'' යන භාරතීය ජාතික ගීය රචනා කිරීම දැක්විය හැකිය.
රවීන්ද්‍රනාත්තුමා ඉන්දියාවේ ජාතික නිදහස පිළිබඳව ව්‍යාපාරයේත්, අහිංසා, අමධ්‍යප ආදී සත් ව්‍යාපාරවලත් පෙරමුණ ගන්නා ලදී. ඔහු ලියූ බොහෝ දේ තුළින් ශ්‍රමාභිමානය, ස්වශක්තිය, ආදීනත්වය හා නිර්ව්‍යාජත්වය අගය කරනු ලබයි. අන්ධ විශ්වාස, මිත්‍යා ඇදහිලි, කුහකත්වය (Hypocrisy), පරගැතිභාවය හා අහංකාරය හෙලා දැකීම සිදු වෙයි. ඔහුට වර්ශ 1913 දී සාහිත්‍යය පිළිබඳව නොබෙල් ත්‍යාගය පවා හිමි විය.
විශ්ව භාරතීය විශ්ව විද්‍යාලය, ශාන්ති නිකේතනය හා ශ්‍රීපාලි විද්‍යාලය ආරම්භ කිරීම, භාරතීය ජාතික ගීය රචනය හා භාරතීය සාහිත්‍ය අපරදිගට හඳුන්වා දීම ආදී අතිශයින් වැදගත් අමරණීය සේවාවන් කළ ථාගෝර්තුමන් වර්ශ 1941.08.07 වන දින කල්කටාවේ ජොසෙන්කෝ නම් තම උපන් ගමේදීම මෙලොවින් සමු gගනු ලැබීය.
විදේශයන්ගෙන් පිදෙන සම්මාන මහත් සේ සැලකුණ යුගයක බ්‍රිතාන්‍ය අධිරාජ්‍යවාදයට එරෙහිව තම දේශයේ නිදහස උදෙසා ඇප කැප වූ ථාගෝර්තුමා වර්ශ 1915 දී බ්‍රිතාන්‍ය රජය ඔහුට පිදූ නයිට් සම්මානය පවා ප්‍රතික්ශේප කරන ලදී. එතුමන්ගේ වියෝවෙන් පසු ඔහුගේ නිර්මාණ රුසියන්, ජපන් හා සිංහල ආදී භාෂාවන්ට පරිවර්තනය කරන්නට වූ අතර කෙටිකතා, සිනමා සිත්තම්වලට ද නැගිනි. ''කාබුල්කාරයා'' හෙවත් කාබුලිවලා යනු ඉන් සුප්‍රකට කෘතියකි.
No comments